O Premio de Poesía Florencio Delgado Gurriarán creouse no 2019 anos coa intención de promover a creación literaria e tamén reivindicar a figura do poeta de Córgomo de cara ás Letras Galegas. Ese segundo obxectivo xa está cumprido pero o certame poético, un dos máis importantes de Galicia a nivel de dotación económica, consolídase e celebra neste 2022 a súa cuarta edición.
O proxecto comarcal As Letras de Florencio presentou o 01 de agosto no Concello de Vilamartín de Valdeorras as bases e o cartel deste ano, para o que se contou coa colaboración da artista plástica ruesa Carina Rodríguez. Na presentación, o alcalde de Vilamartín, Enrique Álvarez Barreiro, desglosou as características do premio que son similares ás doutros anos: poemas inéditos, en galego e cunha extensión máxima de entre 15 e 90 versos. O certame ten un premio único de 3.000€ e poderase presentar calquera persoa que non fose gañadora en anteriores edicións.
Na presentación estiveron, ademáis do alcalde de Vilamartín, a alcaldesa de Petín, Raquel Arias, a concelleira de Cultura do Barco, Margarida Pizcueta, o concelleiro de Deportes e Tempo Libre de Vilamartín, Manuel Sánchez, o presidente do Instituto de Estudios Valdeorreses, Aurelio Blanco Trincado, e Carina Rodríguez, autora da imaxe do cartel. Dela, Raquel Arias destacou a calidade do seu universo artístico, e celebraba que o certame «sirva para dar visibilidade ás artes plásticas feitas por valdeorreses».
Aurelio Blanco (esq.), Margarida Pizcueta, Enrique Álvarez, Raquel Arias, Carina Rodríguez e Manuel Sánchez
Un lienzo transformado na mirada do artista
Carina Rodríguez (A Rúa, 1973) é unha pintora autodidacta cunha extensa obra plástica e que nos últimos anos ten feito incursións noutras áreas como a ilustración e o textil. É tamén xestora cultural e investigadora, sendo unha das impulsoras do Marco, a mostra de arte na rúa que se celebra en Petín dende hai dous veráns. Para este cartel empregou un lienzo con técnica de colaxe titulado O bosque azul e o cal tratou dixitalmente para convertelo nunha metáfora da mirada do artista sobre o puntual para proxectalo ao global: «Fixen unha obra que nos transportase a ese mundo onírico no que nos temos que atopar para transformar os obxectos cotiás e os acontecementos do día a día en poesía».
Carina Rodríguez é autora do cartel, unha adaptación dun lienzo titulado O bosque azul
Anxo Baranga presentará a gala de premios en outubro
Unha das novidades que ten esta cuarta edición é que a obra premiada non se difundirá ata a gala de entrega do premio, na que coma sempre se recoñecerán a tres finalistas e mais un gañador. Este ano o evento regresa ao Teatro Lauro Olmo do Barco e a súa concelleira de Cultura, Margarida Pizcueta, destacou que o mestre de cerimonias no ano das Letras de Florencio será Anxo Baranga polo seu compromiso e traballo a prol das Letras de Florencio e tamén das artes vivas en Valdeorras. «Mandámoslle toda a nosa forza, porque pasou un problema de saúde, e queremos que estea listo para esa gala de outubro na que queremos recoñecer o traballo que fixeron el e mais o colectivo teatral que impulsou para divulgar a figura de Florencio delgado Gurriarán».
O prazo de presentación dos traballos poéticos comezará en canto as bases se publiquen no Boletín Oficial da Provincia de Ourense, previsto para os próximos días, e permanecerá aberto ata o 29 de setembro. A Deputación de Ourense é, precisamente, o principal respaldo económico que ten este premio e a ela se dirixiu Aurelio Blanco, presidente do IEV, para agradecer o apoio e suxerir que se incremente nos próximos anos para facer deste certame «o principal premio de poesía de Galicia».
DESCARGAR BASES / DESCARGAR FORMULARIO INSCRIPCIÓN
Un xurado cheo de talento e paixón literaria
Artistas, docentes, poetas, investigadoras, críticos literarios e activistas culturais. No xurado do IV Premio de Poesía Florencio Delgado Gurriarán está presente un perfil moi variado de creadoras e amantes da literatura que asumen con ilusión esta responsabilidade no ano no que o autor valdeorrés protagoniza as Letras Galegas. Os integrantes do xurado desta edición 2022 son Cristina Pato, unha das creadoras ourensanas con maior proxección internacional; María Xesús Lama, profesora da Universitat de Barcelona e investigadora; Ramón Nicolás, crítico literario, profesor, tradutos e escritor, Antía Balvís, poeta e activista cultural que forma parte da xeración do século XXI dos poetas galegos, Emilio Vega, biblófilo, divulgador e membro de Valdeorras Infinda e do proxecto As Letras de Florencio; e Eilún del Pazo, poeta e gañadora da anterior edición do premio.
Cinco poemas finalistas de entre 174 presentados
Este luns 17 de outubro foi unha intensa xornada relacionada coa poesía no Barco de Valdeorras. A seis días da celebración da gala do IV Premio de Poesía Florencio Delgado Gurriarán difundíronse os nomes dos finalistas e os seus poemas, entre os que o sábado se desvelará o gañador ou gañadora. Son os seguintes:
- «Ancorar toda esta auga», de Beatriz Dourado (Barcelona, 1985)
- «De tuin der lusten», de Fran Fernández Davila (Vigo, 1974)
- «Antígona cantoume polas vosas voces», de Patricia Carballal (Arcade, 1978)
- «Receita cromática para unha visión libremente entendida», de Ana Barja (Castro de Rei, 1987)
- «Europa 2079», de Lois Pérez (Lugo, 1979)
Estas cinco obras foron as seleccionadas de entre as 174 que finalmente entraron a concurso. O faio do xurado, integrado por Cristina Pato, María Xesús Lama, Ramón Nicolás, Antía Balvís, Emilio Vega e Eilún del Pazo, a gañadora da anterior edición, será revelado na propia gala, que se celebra o sábado ás 20.30 horas no Teatro Lauro Olmo do Barco. Na presentación das obras finalistas, Débora Álvarez, directora do proxecto As Letras de Florencio, celebrou a calidade dos textos recibidos e agradeceu o traballo e o entusiasmo do xurado durante todo o proceso. A concelleira de Cultura do Barco, Margarida Pizcueta, destacou que moitos dos finalistas son docentes o oue amosa: «a paixón polas letras e pola lingua dende o sector educativo, o que é unha garantía de que hai futuro para a creación sendo un gran exemplo para as novas xeracións».
Beatriz Dourado gaña o IV Premio de Poesía FDG
«Beatriz Dourado naceu en Barcelona pero é de Lugo, porque os de Lugo nacen onde queren». Así introducía Anxo Baranga, o presentador da gala do IV Premio de Poesía Florencio Delgado Gurriarán, a quen despois se revelaría como a gañadora do certame deste 2022. O seu poema, «Ancorar toda esta auga» foi o escollido polo xurado entre as máis de cento setenta propostas recibidas. Beatriz Dourado é filóloga e docente e xa conta cun poemario publicado «Intraguerras», de Editora Urutau.
